భంగపాటు

మనలో కొంతమందికి తమకు అన్నీ తెలుసునని, సర్వజ్ఞులమనే భావన ఉంటుంది. నిజానికి కొంతమందిలోనే కాదు, చాలామందిలో ఈ స్థితి ఎప్పుడో ఒకప్పుడు కలుగుతుంది. మనకు తెలిసిన విషయం స్వల్పమని దాన్ని మనలో ఉండే అహం గోరంతలు కొండంతలు చేస్తోందని అర్థం చేసుకోలేం ! ఆ అహమే మనని ఆడిస్తుంది. ఆ సమయంలో ఎదుటి వాళ్ళందరూ అమాయకులుగా, బుద్ధిహీనులుగా, చేతకాని వాళ్ళుగా కనిపిస్తారు. అయితే ఈ అహం ప్రభావానికి లొంగిపోయి రెచ్చిపోతే ఎప్పుడో ఒకప్పుడు భంగపాటు తప్పదు.

అదిగో..... అలాంటి భంగపాటే ప్రముఖ ఫ్రెంచ్ రచయిత బాల్ జాక్ విషయంలో జరిగింది. తను అందరిలాంటి వాడ్ని కాననీ, ఓ ప్రత్యేకత కలిగిన వ్యక్తినని ఆయనకు తన మీద తనకు విపరీతమైన నమ్మకం. ఇంతకీ ఆ ప్రత్యేకత ఏమిటంటే ఎవరి దస్తూరీనైనా చూసి, అది రాసిన వ్యక్తి గుణగణాలేమిటో, వ్యక్తిత్వమేమిటో ఇట్టే చెప్పగలగడం. ఈ విషయం ప్రపంచమంతా గుర్తించాలని ఆయన తాపత్రయం. ఆయన తనకు తాను ఇచ్చుకున్న ప్రచారానికి ఈ విషయం మీద ఎంతోమంది ఆయన దగ్గరకు వచ్చేవారు.

అలా ఓసారి ఒకావిడ ఒక నోట్ బుక్ పట్టుకుని వచ్చింది. బాల్ జాక్ దాన్ని తీసుకు చూసాడు. అది బాగా నలిగి, కొంచెం చిరిగి, మాసి ఉంది. చూడగానే అది చాలాకాలంనాటిదని, ఒక చిన్నపిల్లవాడి నోట్ పుస్తకమని తెలుస్తోంది.

ఆ పుస్తకంలోని రాతను నిశితంగా పరిశీలించిన జాక్ ఆవిడ్ని అడిగాడు.
" ఇది మీ అబ్బాయి చిన్నప్పటిదా ? " అని.
ఆవిడ కాదంది.
" కాదుకదా ! అయితే ఈ రాతను బట్టి నేను గమనించిన విషయాలు దాచకుండా చెబుతాను, ఈ అబ్బాయి పరమ సోమరి అవుతాడు. తన జీవితకాలంలో కష్టపడి ఏ పనీ చెయ్యలేడు. దేనికీ పనికి రాకుండా తయారవుతాడు " అంటూ చెప్పుకుపోతుండగా ఆవిడ పగలబడి నవ్వసాగింది.

అదిచూసి తన మాటలు నమ్మడం లేదేమోననే అనుమానం వచ్చింది ఆయనకు." ఏమిటీ ? నేను చెప్పేది మీరు నమ్మటంలేదా ? నేను చెప్పేది నూటికి నూరుపాళ్ళు నిజం " అని దబాయించడానికి ప్రయత్నించాడు.

ఆవిడ కాసేపు నవ్వునాపి " మిస్టర్ జాక్ ! తొందరపడకండి. ఈ నోట్ బుక్ వేరెవరో అబ్బాయిది కాదు. మీదే ! మీ చిన్నప్పటిది !! ఒకప్పటి మీ టీచర్ గారి దగ్గర పాతపుస్తకాలు వెదుకుంటే ఇది కనబడింది. మీకిద్దామని తీసుకొచ్చాను " అని నవ్వు కొనసాగించింది. ఇక మన జాక్ గారి మొహం చూడాలి పాపం !!!

Vol. No. 01 Pub. No. 177